MENSAHE NI CONG. KLAREX SA KASAULOGAN SA EID AL-FIT'R
AKO ug ang akong pamilya nakigduyog sa atong mga kaigsoonang Muslim sa dakbayan sa Cagayan de Oro, probinsya sa Misamis Oriental, sa Pilipinas ug sa tibook kalibutan sa pagsaulog karong adlawa sa Eid’l Fit’r.
Karon ang katapusan sa Balaang Bulan sa Ramadhan ug ginasaulog karon sa atong mga kaigsoonang Muslim ang Pagtapos sa Puasa (Breaking of the Fast kon Eid’l Fit’r) ug pagpasalamat kang Allah, the Merciful and Compassionate, sa iyang kaayo ug pagkamanggihatagon. Hinaut nga siya kanunay mogiya kanatong tanan subay sa dalan sa kamatuoran sa katuyoan.
Ako ug ang akong pamilya kinasing-kasing nga nag-ampo nga unta hatagan kamo sa Labawng Makagagahum og lig-on nga pagtoo ilabina karon niining panahon sa kalisdanan.
Ang paghandum sa panahon diin gipadayag ni Allah ang Koran ngadto kang Propeta Mohammad (Kalinaw Maanaa Kaniya) usa ka panahon sa pagpa-ambit ug pag-atiman pinaagi sa kumbira.
Apan ato kanunay hinumduman nga ang hulga sa Covid-19 kanunay usab anaa busa akong pangamuyo nga sa atong kasaulogan karon kanunay unta natong batonan ang pagsunod gayud sa minimum health protocols.
Ako usab nangamuyo sa atong mga kaigsoonang Muslim nga sa atong pagsaulog karong adlawa sa Eid’l Fit’r ato unta usab hinumduman ang atong mga kaigsoonang naglisud sa ilang kinabuhi tungod sa bisan unsang pagsulay. Hinaut ato pud silang atimanon ug ambitan sa mga grasya ug mga panalangin nga atong natagamtam gikan sa Kahitas-an.
Pinaagi sa atong pagpa-ambit ug pag-atiman kanila, mahimo kitang mas maayo nga mga tawo ug mga deboto sa Ginoo.
Ug sa katapusan, nanghinaut usab ako nga dili ninyo kalimtan ang pag-uban kanamo sa among panaw sa pagserbisyo kaninyo. Unta sa Lunes puhon, inyo kaming buligan aron sa atong pagbarug og balik gikan sa pandemya ug sa padayong pag-uswag, Kauban Ta Uy!
Eid Mubarak! (PR)
