Cancer. Nahinumdom si Ramilo Saavedra dihang gikompirmar sa iyang doktor nga naa na sa Stage 3 ang iyang sakit.
“Wala ko mahibalo kon sa unsang paagi ko luwason sa Diyos gikan niini,” miingon ang 41 anyos nga taga-Zamboanga City.
Sukad siya ma-diagnose, mas gipanguptanpa pag-ayo ni Ramilo angpaglaom gikan sa Kasulatan nga iyang gimahal sukad siya nahimong usa sa mga Saksi ni Jehova mga 23 ka tuig na ang milabay.
“Kombinsido kaayo ko nga hatagan ko ni Jehova ug kusog ug kaisog aron makalahutay,” miingon si Ramilo samtang nagpabiling positibo bisag naghulat ug mga 28 ka sesyon sa chemotherapy ug uban pang pagtambal.
Karong Marso ug Abril 2022, si Ramilo moduyog sa minilyong mga Saksi sa tibuok kalibotan, lakip sa gatosan pa diha sa mga kongregasyon sa lokal nga komunidad, sa pagpangimbitar sa tanan nga paminawon ang lig-ong mga rason kon nganong makasalig ta sa paglaom nga gisaad sa Bibliya. Kini ipresentar pinaagi sa usa ka binase sa Bibliya nga pakigpulong sa semana sa Abril 4, 2022.
“Ang Bibliya naghisgot ug kaugmaon nga walay kasakit ug pag-antos — bisan kamatayon, dinhi mismo sa yuta,” miingon si James Morales, spokesman sa mga Saksi ni Jehova sa Pilipinas. “Daghang tawo ang nasorpresa dihang ilang nahibaloan ang orihinal nga katuyoan sa Diyos nga magpuyo sa paraiso dinhi sa yuta ang hingpit nga mga tawo. Wala mausab ang iyang katuyoan. Duna gyoy maayong rason nga motuo niini nga saad.”
Ang pagtuo nianang umaabot nga realidad nakapausab sa kinabuhi ni Neneng Tubiano, usa ka madasigong magtutudlo sa Bibliya nga nagpuyo sa Lapasan, Cagayan de Oro City.
Nag-antos siya gumikan sa fatty liver ug gallstone.Dugang pa, namatay ang iyang inahan samtang ang iyang anak nahisalaag ug nagkaproblema. “Dili matupngan ang kasakit nga bation dihang mawad-ag mga minahal,” miingon siya. “Pero ang Diyos nagsaad nga anihon nako ang maayong mga resulta kon molahutay ko.”
Si Neneng padayong milahutay nga may positibong panglantaw ug sulod na sa 37 ka tuig, siya madasigong nagtudlo sa mga saad sa Bibliya bahin sa usa ka kalibotan nga wala nay kasakit ug kagul-anan.
Nakaplagan sab ni May Oliver, 51 anyos, nga nagpuyo sab sa Cagayan de Oro City,ang kahupayan gikan sa maong mga saad sa Bibliya.
Ang iyang bana nga si Eric namatay niadtong miaging tuig tungod sa atake sa kasingkasing sa edad nga 48. “Nawad-an kog kinasuorang higala, tigtambag, ug kapikas. Usahay basolon nako ang akong kaugalingon tungod sa nahitabo kaniya,” miingon si May.
Ang pag-imadyin kon unsaon niya pagsugat si Eric panahon sa tibuok kalibotang pagpamanhaw dinhi sa yuta sumala sa gisaysay sa Kasulatan nakatabang kang May nga malahutay ang kasakit sa pagkawala ni Eric.
“Daghang beses kong nag-ampo nga moabot na ang Gingharian sa Diyos, dihangmabalaan na ang ngalan ni Jehova,” miingon siya. “Ug kanunay kong moampo nga kinasingkasing nga akong makita pag-usab si Eric dihang banhawon na siya.”
Paborito ni May ang teksto sa Bibliya nga Roma 8:25, nga nag-ingon nga kita“molaom sa dili nato makita.” Nakatabang ni niya nga mahinamong magpaabot nga matuman ang mga saad sa Diyos. Kombinsido kaayo siya nga magkita sila pag-usab ni Eric sa Paraisong Yuta.
Ang 30-minutos nga programa nga nag-ulohang “Asa Ka Makakaplag ug Tinuod nga Paglaom?” ipahigayon sa tibuok kalibotan diha sa mga kongregasyon sa mga Saksi ni Jehova. Pagkasunod semana, giimbitahan sab ang publiko sa pagtambong sa tinuig nga Memoryal sa kamatayon ni Jesus nga himoon sa Biyernes sa gabii, Abril 15, 2022.
Libre ang pagtambong niining duha ka programa, ug walay registration nga himoon. Ang impormasyon kon unsaon pagtambong diha sa inyong lugar makita sa www.jw.org.
“Sa mga panahon nga sama niini, mas labi pa natong gikinahanglan ang paglaom,” miingon si Morales. “Ang paglaom motabang sa usa ka tawo nga lantawon ang umaabot uban ang kaisog ug pagsalig nga matuman gyod ang nindot kaayong mga saad sa Diyos. Busa ang pagtambong sa usa niining espesyal nga mga programa posible gyong makapausab sa kinabuhi sa usa.”
