Dili tinuod nga wala na’y utang ang Pilipinas kay gibayran na ni Presidente Rodrigo Duterte, sukwahi sa giingon sa YouTube video ni “Mimaa” niadtong Mayo 22.
Pangangkon: “WALA NANG UTANG ANG PILIPINAS! BINAYARAN NA NI DUTERTE! KASO HINDI BINALITA NG ABS, GMA, RAPPLER.”
Marka: Bakak
Kini nga voice over o narration madungog sa video: “Okay, bago po umalis si [Pangulong Rodrigo] Duterte or bago siya aalis ng kanyang termino sa pagkapangulo ay binayaran na niya ho ang 300 billion na utang sa central bank loan sa Pilipinas.”
Gipakita usab ni Mimaa sa video ang screenshot sa usa ka artikulo sa Manila Bulletin ug gilakip kini sa audio sa usa ka taho sa balita bahin sa pagbayad sa utang sa gobyerno.
Apan ang tinuod, ang P300 bilyones nga nahisgutan sa video nga giingong gibayad sa gobyerno ngadto sa Bangko Sentral ng Pilipinas (BSP) kabahin lamang sa domestic debt sa Pilipinas ug dili katumbas sa total outstanding nga utang sa National Government o total utang sa gobyerno.
Gani, niadtong Enero, niabot na sa P8.37 trilyon ang domestic debt sa Pilipinas. Mas taas kini kaysa Disyembre sa miaging tuig, sumala sa usa ka taho nga gipagawas sa Bureau of the Treasury kaniadtong Marso 4.
“NG domestic debt amounted to P8.37 trillion, which is P197.38 billion or 2.4% higher compared to the end-December 2021 level. This is primarily due to net availment of domestic financing amounting to P197.04 billion including the P300 billion provisional advances availed by the NG from the BSP for budgetary support.”
Matod sa Department of Finance, ang maong P300 bilyones ug uban pang provisional advances sama niini nakatabang sa gobyerno sa pagpadayon sa mga programa niini bisan pa sa pandemya.
Ang video ni "Mimaa" bakak usab nga nag-ingon nga ang mga organisasyon sa media wala nagpahibalo sa pagbayad sa utang sa gobyerno sa BSP.
“So ABS-CBN, Rappler, GMA, nanawagan ho kaming mga bloggers, please naman paki-cover itong nabayarang 300 billion na loan na utang ng Pilipinas.”
Gani, gibalita kini sa ABS-CBN News niadtong Mayo 20.
Gi-report usab kini sa reporter sa ABS-CBN News nga si Warren de Guzman sa Twitter ug gihisgutan usab kini sa iyang report sa Market Edge sa ANC sa samang adlaw.
DOF: The National Government paid in full its outstanding P300 billion provisional advances to the Bangko Sentral ng Pilipinas today, well in advance of the 11 June 2022 actual maturity date.
— Warren de Guzman (@wddeguzman) May 20, 2022
Niadtong Abril, niabot sa P12.76 trilyon ang kinatibuk-ang utang sa Pilipinas, sumala sa taho sa Bureau of the Treasury niadtong Hunyo 2.
Sa pagkakaron, June 9, 2022 kini nga video ni “Mimaa” nakaani na og kapin sa 53,000 ka views ug 4,800 ka likes sa YouTube.
Kini nga artikulo gihubad sa bisaya sa Mindanao Gold Star Daily gikan sa fact check ni Mildred Mira, ABS-CBN Investigative & Research Group sa ABS-CBN News ug gipatik kini ni adtong Hunyo 4 karon tuiga.
(The Mindanao Gold Star Daily is part of the more than 100 organizations online initiative from media, coalitions, civil society, business, academe, law, and the religious sector called ‘#FactsFirstPH.’ The initiative aims to collectively push for truth-telling and debunking lies through four steps: fact-checking by news organizations; networking by civil society and grassroots groups; research and analysis by academic institutions; and seeking accountability by lawyers’ groups.)
